Каталонскиот парламент денеска во попладневните часови ја прогласи Каталонија за независна држава. Кога станува збор за спортот, зад сето ова политичко превирање, се поставува едно големо прашање – и што сега? Што ќе биде со натпреварувањата, тимовите, националните селекции?
Ситуацијата воопшто не е наивна, но едно е сигурно – едностраната прогласена независност не значи дека од утре ќе се смени сѐ, ниту дека каталонските спортисти и клубови сега ќе играат каде сакаат и како сакаат. Тој процес на одвојување од Шпанија, ако воопшто дојде до тоа, ќе трае доста долго.
Првичните проценки се цели шест години, а во наредните месеци сигурно нема да има никакви исфрлувања од натпреварувањата. Фудбалот е она што луѓето најмногу ги интересира, односно судбината на Барселона. Од тој клуб испратија јасна порака, тие сакаат да продолжат да играат во Примера, но јасно е дека одлуката треба да ја донесе лигата. Сега за сега сигурно е дека актуелната сезона ќе продолжи по планот и дека така ќе биде сѐ додека каталонската фудбалска федерација не почне да ги бара своите права кон УЕФА и ФИФА.
Според шпанскиот закон за спорт и тимови од „странски“ држави, не е можно екипи од други држави да се натпреваруваат во шпански лиги, освен од Андора, па доколку тековниот процес продолжи да трае, а владата на Шпанија го применува законот, сите каталонски екипи и спортисти ќе бидат исклучени од постоечките шпански лиги.
Во меѓувреме, Каталонците нема да можат да играат во европските натпреварувања, барем не додека официјално не ги признае, за почеток УЕФА.