По сугестија на Марјан Маркоски, кој беше прв судија, па се повреди беше досуден удар од белата точка во 100. минута, а Дејан Блажевски погоди за победа на Македонија Ѓ.П против Академија Пандев.
Бојан Најденов е трагичар на мини-дербито во Ѓорче Петров, отако играше со рака во седмата минута од судиското продолжение, а четвртиот судија реагираше малку и со задоцнување и беше досуден пенал за Македонија против Академија Пандев.
Македонија Ѓорче Петров успеа да ја искористи предноста на домашен терен и од играч повеќе што ја имаше половина час.
И двете екипи имаа шанси, пред да биде постигнат единствениот гол, а и на двете страни се тресеше рамката од голот по ударите на Китановски и Стојковски.
Гостите од Струмица беа храбри, не се бранеа, иако од 66. минута играа со 10 фудбалери по исклучувањето на Стефан Костов, но несмасниот потег на Најденов ги чинеше бод.
