Немаше дилеми дека „волшебниците“ од Каталонија ќе ја задржат доминацијата на Европа во клупскиот фудбал на денешното финале во Јокохама и така бидна. Барселона славеше против Ривер плејт со 3-0 лесно и убедливо, почнувајќи го танцот до титулата уште во првото полувреме.
Меси ја отвори ревијата во 34. минута, со еден сомнителен гол, во чие креирање имаше и играње со рака, сепак на полувреме важеше 1-0 за Барса. Во вториот дел Луис Суарес стапи на сцена со два гола, но откако имаше одлични асистенции и во двете ситуации. Прво Бускетс му сервираше топка во контра за 2-0 по четири минути во вториот дел, а потоа во 68. минута Нејмар му „намести“ на глава за 3-0.